август 3, 2021

Џолев: Во Грција судовите се под клуч, а ние и за време на пандемија работиме

Претседателот на Кривичниот суд, Иван Џолев, во однос на критиките кон судството, рече дека не може да се исклучи фактот, дека во една судска постапка освен судија професионалец, учествуваат и судии поротници кои се претставници на граѓанскиот сектор со право на глас исто како и судијата. Тој својот став го сподели на јавната дебата „Истражување и анализа на состојбите со корупцијата во правосудството“ во организација на Државната комисија за спречување на корупцијата.

– Оваа критика не ја доживувам како критика на судиите професионалци, односно ја доживувам на ист начин како и критика на самото општество, на граѓаните. Тие учествуваат во иста мера во носењето на судските одлуки, како и судиите професионалци, да не кажам дека нивното влијание е дури и поголемо, отколку на судиите професионалци. Така да оваа критика, апсолутно може да се разбере и како самокритика, рече Џолев.

Треба да трпиме критики и заслужуваме критики, посочи Џолев, но треба да се зборува и за успесите.

– Никаде не зборуваме за успесите. Во едно време на пандемија, која трае две години, во нашиот сосед Грција судовите се под клуч. За разлика од нив, кај нас се суди и инсистираме да дојдеме до правдата и да се завршат предметите. Во овој период се завршија голем број предмети. Никаде нема пофалба, и не е убаво сами да се фалиме, рече Џолев.

Тој ги повика медиумите и невладините да направат споредба, да видиме колку траат постапките во Франција, посочувајќи го случајот со „Шарли Ебдо“ од 2015 година и експресната пресуда за случајот „Двојник“ кај нас, каде се донесе експресна пресуда за случајот со пасошите.

Во однос на резултатите од анкетата на ИРИ, Џолев смета дека е добра вест, укажувајќи дека ако пред година сме зборувале за доверба од четири проценти на судот или обвинителството, а сега за над 20 проценти доверба, тоа значи дека се движиме во добар правец.

– Во едно целосно биполаризирнао општество добро е ако стигнете до 50 проценти доверба. Тоа е одлично и ние сме сега на половина пат, од она што јас би го нарекол одлично, рече Џолев.

Сподели
  •  
  •  
  •  
  •  
  •  
  •