јануари 25, 2021

Владата го утврди предлог-законот за нов клинички центар

Владата на седница го утврди предлог-законот за реализација на проектот „Нов универзитетски клинички центар“.

Овој закон е по предлог на Министерството за здравство, а со него се уредуваат постапката и условите за реализација на проектот, односно изградба и ставање во употреба на комплексот на градби како градби од значење за Републиката.

Од Владата велат дека со предложените решенија ќе се овозможи унапредување на ефективноста и ефикасноста на терциерното здравство во земјата преку реализација на проектот „Нов универзитетски клинички центар“ и ќе се обезбеди континуитет во обезбедувањето висококвалитетни здравствени услуги за населението на целата држава.

– Предлог-законот опфаќа и реализација на дополнителни инфраструктурни услови за третман и сузбивање заразни болести и инфекции заради заштита на населението од заразни болести, оптимизација на времето, трошоците или другите ресурси, со цел ефикасна реализација на проектот ‘Нов универзитетски клинички центар’ преку посебни услови и постапки за доделување договори за јавна набавка на стоки, услуги и работи за потребите на проектот ‘Нов универзитетски клинички центар’, како и други прашања уредени со овој предлог-закон – информираат од Владата.

Финансиските средства за реализација на овој болнички комплекс ќе се обезбедат од буџетот на Република Македонија.

Сподели
  •  
  •  
  •  
  •  
  •  
  •