декември 2, 2020

Шилегов: Ставот на Захариева со споменувањето на Тито, не е ништо друго освен глупост

Изместување на тезите е всушност барање алиби за глупости, е ставот на скопскиот градоначалник Петре Шилегов на тврдењата на бугарската министерка за надворешни работи Екатерина Захариева, поврзани со прославата на 13 Ноември, Денот на ослободувањето на Скопје и споменувањето на Јосип Броз Тито.

Сподели
  •  
  •  
  •  
  •  
  •  
  •  
Петре Шилегпв

„Секоја глупост бара алиби, а ставот на Захариева не е ништо друго, освен глупост. Обидувајќи се да ја спаси позицијата на Бугарија, која мислам дека повеќе ѝ наштетува на Бугарија отколку на Македонија, се обидува да ги измести тезите. Она што се случи во Скопје на 13, односно 14 ноември е изложба од Белгија со поставка за Тито и ништо повеќе. Сега, барајќи алиби за сопствената глупост се изместуваат тезите и се прават обиди да се објаснат необјаснивите позиции на Бугарија за почеток на преговорите на Македонија со ЕУ“, изјави Шилегов во разговор за бугарската ТВ Европа.

На прашањето за коментар дека во ослободувањето на Скопје учествувале и бугарски војски, односно Првата бугарска армија, Шилегов вели дека Скопје го ослободиле партизански единици на НОВ, придружувани од дел од трансформираната бугарска окупациска војска.  

„Она што се случило во ‘41 година е окупација на Македонија од царската бугарска војска која во ‘44 заради сплет на околности се трансформирала во ‘отечествен фронт‘. Тоа се работи кои де факто се случилео и не треба да мижиме пред тоа, но да се зборува дека окупаторите кои се трансформираа во ‘отечествен фронт‘ го ослободиле Скопје е непринципиелна позиција, тие биле затекнати тука како окупциски војска и ја следеле глобалната политика на Бугарија во тој период. Треба да се погледне малку поинаку сопствената позиција. Не може да се избегне дека Бугарија била колаборатор со фашистичка Германија“, одговара Шилегов.

Тоа, според водителот, е историски факт, но неговото прашање е како изгледа бугарската позиција да не биде третирана како окупатор туку како бугарска администрација во тогашна Македонија.

„Мојот град загубил 5.000 жители за време на администрирањето. Од нив 950 во борби со администраторите, како што ги нарекувате, а останатите се цивилно население. За нијанса да бидеме покоректни како народи за да може шансата која си ја имаме дадено со Договорот да ја искористиме во најповолна смисла. Во моментов за жал има враќање на позициите на Бугарија назад кои за мене се неразбирливи. Треба многу внимателно да зборуваме. Замислете во кампања ние да користиме антибугарски позиции“, вели Шилегов.

Според него, алиби за глупоста е и тврдењето на Бугарија дека во земјава се води антибугарска кампања, додавајќи дека позициите на Захариева се едноставно непринципиелни.

Реакциите во Македонија, според Шилегов се оправдани, бидејќи никому не му треба документ за да му каже дека е Македонец.  

„Најлошото нешто во моментов е тоа што се случува, да се враќаме назад во историјата за да бараме алиби за сопственото поведение. На нашите граѓани имтреба подобра сегашност и извесна и стабилна иднина. Некогаш во политиката и не треба дипломатија, замислете да ми кажете дипломатски дека моите корени се бугарски исто и јазикот, ако е спакувано во добар збор не значи дека е правилно. Долгорочно ова е губитничка позиција пред сѐ за Бугарија“, одговори Шилегов на забелешката дека не зборува баш дипломатски.  

На прашањето, нели е лесно да се одговори на барањето од Софија да кажеме дека корените ни се бугарски, Шилегов возврати со прашање: „Ако бевме во обратна позиција, и кажевме ‘да, само ако кажете дека вашите корени се македонски‘, што ќе одговоревте?“, но остана без одговор од водителот.

Сподели
  •  
  •  
  •  
  •  
  •  
  •