Јавниот долг на Германија се искачи на 2,1 трилиони евра

Вкупниот јавен долг на државата, провинциите и општините се зголеми за 11 проценти во споредба со крајот на минатата година. И покрај високото ниво на јавен долг, економистите не сметаат дека зголемувањето е драматично.

Јавниот долг на Германија годинава достигна рекордни 2.100 милијарди евра поради кризата со короната, објави во вторникот Државниот завод за статистика. „Вкупниот јавен долг на државата, провинциите и општините се зголеми за 11 проценти во споредба со крајот на минатата година и изнесуваше 2,1 трилиони евра на крајот на јуни“, се вели во соопштението на канцеларијата во Визбаден. Тоа е највисокиот јавен долг досега забележан во Германија. Зголемувањето е поврзано со мерките воведени за борба против ефектите на пандемијата на коронавирусите.

Јавниот долг на федерацијата најмногу се зголеми, а меѓу федералните провинции во најнаселената провинција Северна Рајна-Вестфалија. И покрај високото ниво на јавен долг, економистите не го сметаат зголемувањето за драматично.

Нови долгови од 90 милијарди евра

„Зголемувањето на државниот долг е совршено соодветно, дури и кога станува збор за толку големи износи, бидејќи спречи уште полоша финансиска криза“, изјави за Ројтерс Јенс Суедекум, професор на Универзитетот во Диселдорф. Тој смета дека државата ќе го „поднесе добро“ новиот долг, бидејќи практично не плаќа камата. Во Бундестагот во моментов се разгледува буџетот за следната година, кој предвидува нови долгови од околу 90 милијарди евра. Сојузниот министер за финансии Олаф Шолц предупреди дека мерките за финансиска помош за економијата не смеат нагло да бидат прекинати. „Ако го сториме тоа сега, подоцна ризикуваме многу поголеми трошоци и со тоа ја ставаме иднината во прашање“, рече Шолц во вторникот во парламентот.