Грција: Најавите на НАТО за преговори со Турција не одговараат на реалноста

Претходно, генералниот секретар на Алијансата, Столтенберг, објави дека Атина и Анкара се согласиле да започнат технички преговори. Од 10 август, бродот „Орук Реис“ спроведува истражување крај грчкиот остров Кастелориза.

Официјална Атина негираше дека ќе има преговори со Анкара за деескалација на истокот на Средоземното море, што неколку часа претходно го објави генералниот секретар на НАТО, Јенс Столтенберг. „Информациите за наводните технички преговори во НАТО не одговараат на реалноста“, објави грчкото Министерство за надворешни работи во четвртокот вечерта, пренесува Бета, повикувајќи се на Франс прес. Според објавата на Твитер од генералниот секретар на НАТО, Грција и Турција, членки на Алијансата, „се согласија да започнат технички преговори во НАТО“, со цел да се спречат понатамошни инциденти на истокот на Средоземното море.

Турски брод за истражување на сеизмичка нафта и гас под вода, придружуван од воени бродови, се наоѓа во тие води од 10 август.

Меѓусебни воени вежби

„Ја имаме предвид намерата на генералниот секретар на НАТО да работи на воспоставување механизми за деескалација … Сепак, деескалација ќе се случи само со непосредно повлекување на сите турски бродови од континенталниот гребен на Грција“, додаде Министерството од Атина. Од 10 август, Анкара држи сопствен истражувачки брод Орук Реис (Барбароса), придружуван од своите воени бродови, за да спроведе истражување покрај грчкиот остров Кастелориза, на само два километри од турскиот брег, во област богата со јаглеводороди. Тензиите се зголемија кон крајот на август, бидејќи и Турција и Грција изведоа спротивни воени маневри, Турција со САД, потоа со Русија, а Грција со Франција, Кипар и Италија.