декември 8, 2022

Тешка сообраќајка кај Штип, во едно од возилата се превезувале мигранти

Тешка сообраќајна несреќа се случила вечерва во близина на штипското село Лакавица. Во судирот на две возила повредени се 13 лица. Во едното возило се превезувале мигранти.

Портпаролката на СВР-Штип, Гордана Панајотова, потврди дека во несреќата учествувале две возила, меѓутоа повеќе детали како се случила не може да даде, бидејќи во тек е увидот од страна на истражните органи.

Директорот на Клиничка болница Штип, Ален Георгиев вели дека во болницата се хоспитализирани 13 лица, од кои 11 се мигранти и двајца се македонски државјани.

Според она што му е презентирано од страна на дежурните лекари, прв впечаток е дека ниту еден од повредените не е во животозагрозувачка состојба, но во тек се прегледите и снимањето со цел да им се утврдат повредите.

Првично станува збор за мигранти од Пакистан, а мигрантите кои се во моментов во болницата во Штип ќе бидат примени на две одделенија, на ортопедија и на хирургија. Георгиев вели дека во текот на ноќта мигрантите ќе бидат и тестирани за ковид-19.

Повеќе детали околу несреќата се очекува вечерва или во текот на утрешниот ден.

Сподели