декември 2, 2022

Мицкоски за новата снимка: ВМРО-ДПМНЕ никогаш не било против СЈО, туку против политичките злоупотреби

Лидерот на ВМРО-ДПМНЕ, Христијан Мицкоски ја потврдува автентичноста на разговорот меѓу него и и Зоран Милевски – Кичеец, што денеска беше објавен на Јутјуб, оценувајќи дека се работи за монтажа на актуелната власт.

  • Тоа е само еден разговор, а се сечат и монтираат парчиња по потреба на СДСМ и Зоран Заев, мислат дека тоа ќе помогне нешто во нивната кампања за намалување на дебаклот што им следи. Јас сум го кажал тоа и во разговорот, дека кога ја преземав ВМРО-ДПМНЕ пред точно 30 месеци, партијата беше во незавидна финансиска ситуација, со блокиран имот од истата онаа судијка Димишкова која е сестра на оној адвокат Димишков, кој го слушавме како бара шест милиони евра од познат бизнисмен за да биде ослободен од притвор. Да, во тој момент имавме сериозни потешкотии, нешто слично претпоставувам како што ќе ја затекнеме државата после 15 јули. Останатиот дел од разговорот сум го коментирал и во минатото дека мора да има правда и право, но она вистинско, а не онакво какво што му одговара на СДСМ и Зоран Заев, истакна Мицкоски.

Тој за МИА додаде дека забелешките на ВМРО-ДПМНЕ за работата на СЈО не значеле барање начин Орце Камчев да се спаси од обвиненијата.

  • За останатиот дел од разговорот, јас сум коментирал и во минатото дека мора да има правда и право според законите, а не според она што им одговара на СДСМ и Зоран Заев, олицетворено во „Луј Витон“ обвинителството и „трас-трас“ судството. Деновиве ќе се изнаслушаме се и се што, но за нас е важно да останеме фокусирани на понудата, зашто на граѓаните во овие тешки моменти им треба визија за понатаму, а не вакви би рекол, монтирани разговори, во случајот еден разговор, којшто Зоран Заев и СДСМ мислат дека ќе им донесе некаков поен, но им благодарам еве што и тие овозможија уште еднаш да се слушне целата вистина како беше кога ја презедовме ВМРО-ДПМНЕ, но е еве 30 месеци потоа и со блокиран имот и со долгови доаѓаме до избори на кои се бориме за 61 пратеник, вели Мицкоски.
  • ВМРО-ДПМНЕ никогаш не се противело на работата на Специјалното јавно обвинителство, но и во минатото и сега ќе повторам, кога тоа беше оперативно имаше сериозни индиции за злупотреба и политичко влијание. Тоа се потврди преку она „Луј Витон“ куферче, преку оние разговори што минатото лето јавноста можеше да ги види. Всушност се потврдува на секојдневна основа дека еден од осудените во случајот „Рекет“ доби смртни закани, при што неговиот адвокат ги пренесе во јавноста, дека треба да молчи и да не кажува многу. Она што ние го знаеме, а се шушка гласно во кулоарите на Обвинителството, е дека Бојан Јовановски поднел неколку десетици кривични пријави против највисокото раководство на СДСМ и многу видни членови за злоупотреба, измама, криминал и корупција. Сепак, Обвинителството, вакво какво што е предводено од Вилма Русковска, тоа нема да го дозволи, истакна Мицкоски.

Сподели